Pas çdo ndeshje apo çdo jave të luajtur në Serinë A, emri i Thomas Strakoshës është në krye të listave për gardianët e spikatur.

Kështu ka ndodhur edhe së fundmi, kur prestigjiozja italiane “Gazetta Dello Sport” ka përpiluar një material special me statistika në lidhje me gardianët e Serisë A.

Në këtë listë, matësi kryesor dhe elementi që ka përcaktuar renditjen e tyre, është pritja që ka bërë sezonin e përllogaritur në përqindje. Thomas Strakosha është i dyti në këtë renditje, në bazë të ecurisë së deritanishme, që kanë bërë skuadrat dhe portierët e elitës së futbollit italian.

Gardiani i Lacios ka arritur të renditet në vendin e dytë, në bazë të përqindjes së pritjeve, që ka bërë deri më tani në kampionatin italian. Gardiani i Kombëtares e gjen veten me 78.9% pritje dhe gjendet pas portierit të Romës, Alison, me 86.5% pritje. Shqiptari ka arritur të lërë pas emra si Handanoviç që po tregon superformë me Interin javë pas jave, apo edhe Bufon e Donaruma, të cilët janë edhe dy gardianët më të përfolur në Itali për cilësitë e tyre, shkruan Panorama.

Portieri tjetër i Kombëtares, Etrit Berisha, renditet në vendin e 17-të dhe lë pas gardianin e Milanit, Donarumën, i cili është në vendin e parafundit. Strakosha, me paraqitjet e vazhdueshme që është duke bërë si në serinë A ashtu edhe në Europa Ligë me Lacion, ka arritur që të rritë shumë vlerën e kartonit të tij dhe të bëhet një portier i lakmueshëm nga skuadrat e mëdha.

Madje, së fundmi, në mediat italiane është përmendur edhe fakti që mund të jetë kandidaturë për të zëvendësuar Bufon te Juventusi.